මාර්ගගත ක්‍රමවේදයට අදාලව ජාතික හැඳුනුම්පත් තොරතුරු සනාථ කිරීම
(NIC LOOKUP SYSTEM)
විද්‍යුත් ජාතික හැඳුනුම්පත් ව්‍යාපෘතිය මගින් නුදුරු අනාගතයේදී සෘජුවම බාහිර ආයතනවල පරිගණක පද්ධති වෙත පුද්ගල තොරතුරු තහවුරු කර දීමේ ස්වයංක්‍රීය සේවාව අරඹනතුරු අන්තර්කාලීන සේවාවක් ලෙස ආරක්ෂිත වෙබ් සේවාවක් ලබාදීම පුද්ගලයන් ලියාපදිංචි කිරීමේ දෙපාර්තමේන්තුව විසින් මේ වන විටත් ආරම්භ කර ඇත. ඒ අනුව මෙම සේවාව මගින් පුද්ගලයාගේ එකඟතාව සහිතව පුද්ගල රහස්‍යභාවය ආරක්ෂා වන පරිදි ජාතික හැඳුනුම්පතෙහි තොරතුරු දෙපාර්තමේන්තුවේ ලියාපදිංචි බාහිර ආයතන වෙත මාර්ගගත ක්‍රමවේදයක් ඔස්සේ ස්වයංක්‍රියව ලබාදීමට අපි කටයුතු කරමු.
අප දෙපාර්තමේන්තුව විසින් ජාතික හැඳුනුම්පත් අංකයට අදාල පරිගනකගත තොරතුරු පමණක් ආරක්ෂිතව ලබාදීම සිදු කෙරෙන බැවින්, එම තොරතුරු පදනම්ව අදාල ආයතනයන් විසින් ගනු ලබන තීරණ සඳහා වගකීම අප සතු නොවන අතර, අදාල ආයතනයෙහි කාර්යයන් සඳහා ගනු ලබන තීරණවල වගකීම අදාල ආයතනය සතුවේ. මේ වන විට හැඳුනුම්පත් නිකුත් කිරීමේ ක්‍රියාවලිය පරිගණක දත්ත පද්ධතියක් ඔස්සේ සිදුකෙරෙන අතර, 2014 ට පෙර මිනිස් ශ්‍රමය උපයෝගී කරගනිමින් නිකුත්කරන ලද ජාතික හැඳුනුම්පත් සම්බන්ධ තොරතුරු ද සැලකිය යුතු ප්‍රමාණයක් මේ වන විටත් දත්ත පද්ධතියට එක් කර ඇත.
යම් පුද්ගලයෙකු සේවා අවශ්‍යතාවයන් ඉටුකර ගැනීමේදී යම් මූල්‍ය ආයතනයක් හෝ වෙනත් ආයතනයක් විසින් එකී පුද්ගලයාගේ ජාතික හැඳුනුම්පතෙහි තොරතුරු දෙපාර්තමේන්තු දත්ත පද්ධතිය තුල නොමැති බවට අදාල පුද්ගලයා වෙත දැනුම් දී ඇති අවස්ථාවකදී, ඒ සම්බන්ධයෙන් දෙපාර්තමේන්තුව වෙතින් තොරතුරු විමසිය හැකිය.
එහිදී අදාල එම පුද්ගලයා වෙත නිකුත් කර ඇති ජාතික හැඳුනුම්පතෙහි නිරවද්‍යතාව තහවුරු කර ගැනීම සඳහා ඉල්ලුම්කරු වෙත දෙපාර්තමේන්තුව විසින් අවසන් වරට නිකුත් කරන ලද ජාතික හැඳුනුම්පත හා ඔහුගේ/ඇයගේ උප්පැන්න සහතිකයේ මුල් පිටපත (අතිරේක දිස්ත්‍රික් රෙජිස්ටාර්ගේ අත්සන හා නිල මුද්‍රාව සහිත), සම්බන්ධ කරගත හැකි දුරකථන අංකයක් ද සමඟ niclookup.ccu@drp.lk විද්‍යුත් ලිපිනය හරහා දෙපාර්තමේන්තුවේ අංක තහවුරු අංශය වෙත යොමු කළ යුතුය. එසේ යොමුකළ නොහැකි අවස්ථාවලදී පමණක් පුද්ගලයින් ලියාපදිංචි කිරීමේ දෙපාර්තමේන්තුවේ පළාත් කාර්යාල හෝ ආසන්නතම ප්‍රාදේශීය ලේකම් කාර්යාලයේ ස්ථාපිත ප්‍රාදේශිය කාර්යාල වෙත එම ලේඛණ ඉදිරිපත් කළ හැකිය.
එසේ ඉදිරිපත්කරන ලද හැඳුනුම්පත් හා ලේඛන පරීක්ෂා කිරීමෙන් අනතුරුව, දෙපාර්තමේන්තු නිර්නායකයන්ට යටත්ව, අපේක්ෂිත සේවාව ද සැලකිල්ලට ගනිමින් එම ජාතික හැඳුනුම්පත් පද්ධතියට ඇතුලත් කිරීම සඳහා සලකා බලනු ලබයි. පද්ධතියට ඇතුලත්කිරීම සඳහා හැඳුනුම්පත භෞතිකව ඉදිරිපත් කල යුතු අතර, පළුඳු වූ, අපැහැදිලි, දුර්වර්ණ වූ හෝ ඉල්ලුම්කරු විසින් වෙනස්කිරීමට ලක් කරන ලද හැඳුනුම්පත් සම්බන්ධ ඉල්ලීම් ප්‍රතික්ශේප කරනු ලැබේ.
විමසීම්
අංක තහවුරු අංශය
දුරකථන අංකය : 011-5226164
විද්‍යුත් තැපෑල : niclookup.ccu@drp.lk